亞視今日開記招強調將轉型做衛視、搞網上平台等發展，股東代言何子慧稱中國文化傳媒想拎4500萬元左右解決一、二月份糧，同時解決部份王征及其他債權人嘅債務，不過呢幾點都得唔到一個通過，希望王生及德勤可以得到一個共識，佢又指中國文化傳媒投放咗600萬元喺亞視，希望德勤可以用嚟發畀145名員工，包括內地，作為一、二月份糧，不過佢就冇提過王征早前向法院申請清盤令及前員工申請破欠等問題。

其後，何子慧接受在場記者提問，被問到如果重新再拍劇會點樣衡量、啲錢點嚟，係唔係之前協盛協豐借貸嘅3億元，何子慧解釋：「協盛協豐借錢畀亞洲電視只係債務重組，集團仲會注資俾亞洲電視去發展，啲錢嚟緊，稍後會同大家講。」

記者又問到何子慧喺會上講過會重聘亞視員工，不過員工已經離開咗公司，憑咩要人相信你哋，何子慧強調：「其實當日員工離開亞視，並唔係自願離開，一再強調及重申，當時喺逼不得已嘅情況，要做一個解散，我唔相信員工會唔相信我哋。」

之後又再有另一記者提問，當時又話要撤換臨時清盤人，同埋重新聘請160位員工，有講過之後有獎金制，何子慧表示：「獎金呢方面，我都要跟進吓，因為當時我哋收到嘅消息係員工唔可以追討一月、二月份嘅欠薪，不過後尾知呢項係唔存在，但我哋樂意用現時嘅資金去發放一、二月薪金，而獎金方面，第日會用另一個形式發放，有待宣佈。」