謝霆鋒近年北望神州後，少咗一陣MK味，多咗幾分chok味，之前主持鋒味節目教整雞蛋仔，睇落一啲都唔似脆口，被網民指「腍過毛巾」，示範咩係軟軟口感(新聞連結： http://bit.ly/2nD2ZQl )，之不過霆鋒整過叉燒分子料理賣相似雞子。

今次霆鋒挑戰用麥記「黑包」，呢個「黑白漢堡」系列有唔少香港網民食過，接受程度一般(新聞連結： http://bit.ly/2wP43DL )，霆鋒同西班牙星級大廚Ramón Freixa早前合作推出「星廚系列」，當中霆鋒就用「黑包」嚟整酷辣雞腿包，用料方面都係由霆鋒諗，以及推出「霆鋒曲奇鴛鴦奶茶新地」、麥旋風。

喺前日喺大陸有得賣，限時發售，賣到10月尾，不過唔係間間大陸老麥都有供應，有幾位大陸網民都試食咗，大致上符合內地口味，話杯雪糕唔太甜。

有網民拎番霆鋒以前拍Rice Burger廣告嘅片重溫，一臉稚氣，拎住個包係咁四圍行，當時得17歲，相比霆鋒呢個酷辣雞腿包廣告，賣pro嘅霆鋒，相隔廿年，多咗陣佬味嘅佢再拎住個包，個feel已經好唔同!