陳志雲為亞視主持嘅《百萬富翁2018》，今日安排傳媒去咗睇個廠景，而且仲搵咗行政總裁吳雨去咗試玩，所有流程、玩法，都冇點變。

吳雨接受挑戰答咗兩條問題，喺「連續性合約受僱女性僱員，可享有多少星期有薪產假？」呢條問題，試用咗50/50錦囊，答案得番【B. 9星期】同【C. 10星期】，結果吳雨揀咗9星期，所以答錯咗，志雲大師即刻上身，寸得吳雨好勁話：「你公司有冇女僱員㗎？咁都答錯，唔知你點做行政總裁，仲有好多電視台搵我做高層㗎！」吳雨解釋太太嗰陣生仔都未有呢啲條例，而且有人事部去負責！

事後陳志雲喺訪問話：「冇火藥味，只係節目特色，大家都玩得起，最緊要係開開心心，好輕鬆，而唔係剩係一問一答嘅遊戲節目，不過我都想佢真係上嚟玩一次，睇吓佢係真唔識定扮唔識，產假係前4後6都唔知！」問到佢有冇擔心會請老友上節目會得罪佢哋？陳志雲就笑笑口話：「老友係要嚟得罪，唔得罪嗰啲就唔係我老友，老朋友係唔計較，不過我又冇問吳雨，我相信佢係唔計較！」

陳志雲仲話呢個節目會喺1月2日開始錄影，不過會先玩慈善版：「因為節目會現場錄影，唔會有太多剪接，可能只係參賽者掛咪先會停一停，所以先玩慈善版先，等氣氛輕鬆啲，之後先會到觀眾參與，佢哋可以填報名表或者app報名，海外嘅朋友都可以參與。」

更多娛聞，喺晒《娛果》
http://fb.com/appledailyent