前日有人聯絡各大報館，聲稱手頭上有一盒對杜德偉（Alex）不利嘅桃色糾紛影帶，會喺噚日凌晨提供畀各報館，最終甩底。噚日呢位仁兄初時話盒帶已經俾一個姓周嘅女人買咗用嚟報復，明顯想拖埋Alex前度女友周汶錡（Kathy）落水，轉頭呢位仁兄又話Alex喺今次桃色糾紛之中做錯咗啲嘢，要求佢喺三日之內道歉，如果唔係就會將影帶同證據向傳媒公開，講嘢一時一樣，可信性真係令人好懷疑。

「有人陷害佢」

噚日馮仁昭同Alex媽媽張露傾電話，佢都好擔心咁款，但就力撐個仔唔會做啲咁不道德嘅事，張露話：「Alex有打電話畀我，話『媽咪唔使擔心，我冇事㗎』，大把女仔追Alex，佢使乜做啲咁嘅嘢？我覺得係有人陷害佢，如果佢真係咁做，我自殺都有之！」
Alex噚日透過經理人姚鳳群否認尋歡：「我們懷疑他開罪別人，被人設計！」至於被拖落水嘅Kathy，亦透過經理人回應話唔知道呢件事︰「呢單嘢有整蠱嘅成份，我哋唔相信Alex會咁樣做，佢哋分手咁耐，都冇乜見㗎啦。Kathy好勤力工作，佢唔想被牽涉入呢啲八卦新聞上。」