【新增內容】
韓國男團Super Junior（SJ）由前日起於首爾蠶室室內體育館連續三日舉行「Super Junior World Tour Super Show7」，SJ更將於明年2月10日唱到港，於亞洲國際博覽館舉行「SUPER JUNIOR WORLD TOUR “SUPER SHOW 7” in HONG KONG」，票價分別為$480、$680、$880、$980、$1,280及$1,680，持指定東亞銀行信用卡嘅粉絲可於聽日至22日優先訂票，門票將於23日公開發售。

另外，SJ噚晚於首爾舉行第二場演出，多名圈中好友依舊現身撐場，而成員於台上亦落地表演，當中始源更不時將衫領開得勁低，隱約騷胸肌誘粉絲。

今天下午嘅首爾尾場中，早前因愛犬咬人事件而缺席SJ新碟宣傳活動嘅始源，就表情沉重地表示：「大家好，對唔住。首先，想跟大家講聲抱歉。」始源坦言決定站喺舞台呢段期間煩惱好耐，但因為成員嘅扶持以及粉絲對佢嘅信任，先可以參與是次演出，講完後似乎因為終於忍唔住淚水而轉身。

而隊長利特亦於台上讀信，當中正在當兵嘅圭賢亦於台下睇騷，利特表示：「最想對圭賢講對唔住，仲好年輕時加入我哋，過得好辛苦，但未有放棄，想跟佢講對唔住，哥哥愛你。」台下嘅圭賢就畀心心回應。

利特又主動提到因是非纏身而缺席嘅成員：「我唔太知道SJ到底幾個人，冇一個一個叫過大家嘅名，想藉由今日叫一下大家。Leader利特、我嘅朋友希澈、韓庚過得好嗎？強仁、神童、晟敏、銀赫、東海、始源、起範、厲旭、圭賢。」利特更講到喊，之後表示：「雖然成員人數有啲不足，但多謝你哋（粉絲）填滿空缺。」

更多韓流，喺晒《娛果》
http://fb.com/appledailyent