《爸爸去哪兒》已經去到第五季，之前傳當局嗌停，被指存在過度消費明星子女之嫌，不利青少年健康成長，不過湖南衛視就將個節目改為芒果TV網上直播，仍然好多人睇，似乎「走後門」，改一改播放方式又得，今日播出，嚟緊下周三就播出一班星爸同小朋友去第一站，要去魚塘，又去自己煮嘢食，今次唔知係唔係啲星爸藝人唔夠，忽然搵咗鄧倫做實習爸爸，今集搵咗小演員阿拉蕾「測驗」。鄧倫呢一part效果相當無聊，估唔到爸爸都有假!

講番真爸爸吳尊，佢出道以來一直瞞婚，曾有報道爆佢已婚生女，事後吳尊否認稱單身仲話要告人，直至出書招認已婚生女，吳尊就鞠躬道歉，「之前做錯一些東西、講錯話，跟大家道歉，對不起」，之後仲同囡囡NeiNei上咗大陸真人騷，晒出父愛，今次吳尊仲挑戰難度，同一對仔女上《爸爸》第五季，今日首播，一開門就同工作人員講小朋友仲瞓緊，吳尊入房錫一錫囡囡，貪靚嘅囡囡NeiNei起身，要自己撥頭髮。上過節目果然愛靚啲。

吳尊一朝早已經忍唔住同囡囡玩，跟住一齊叫醒囝囝Max，弟弟就點都唔起身，吳尊話：「我覺得Max他有一點像小暖男，可是他又有一點頑皮，Max有點像我小時候，對這個世界充滿好奇心。」三父子喺屋企跳跳紮，NeiNei忽然拉低爸爸，囝囝又跳向吳尊，大晒溫情，吳尊話一對仔女同自己玩時，好鍾意仔女嘅調皮，認為小朋友係應該去嘗試唔同嘅嘢，所以作為爸爸，就會比較有耐心一啲。

跟住佢哋一齊食早餐，家姐NeiNei搽花生醬時，弟弟Max竟然伸手過去，仲啜手指上嘅花生醬。估唔到爸爸吳尊出名為食，連囝囝都咁為食。

不過喺節目中，囡囡NeiNei就唔肯講中文，全程講英語，當爸爸吳尊一話一陣俾NeiNei食糖果，NeiNei即刻肯講，而囝囝Max就識數1至10，忽然囝囝講出英語夾雜外語，爸爸同NeiNei都聽唔明，似係玩freestyle。食完嘢，佢哋就一齊執行李，NeiNei自己整理啲衫，當問到吳尊有冇信心照顧仔女出門?吳尊直言如果只係帶一個，佢都可以，帶仔女同行係一個挑戰。