麥長青、楊思琦、黃奕晨同女友、Super Girls成員吳嘉熙（Cheronna）等今日喺沙田出席港台電視節目《手語隨想曲6》宣傳活動，佢哋喺劇中都要學手語演出。

麥長青話佢係即場學：「簡單嗰啲男仔、女仔、打招呼就識嘅。其實香港有30幾萬聾啞人士，原來佢哋3月之前報警係要收錢嘅。係咪好奇怪？因為佢哋要事先喺警方度登記自己係聾啞人士，佢哋要報警就可以發短訊，但係個短訊係要收費嘅。」

麥長青越講越覺得無理，仲話：「啲廢柴議員收咁多稅，都做唔到呢啲嘢，連專畀聾啞人士用嘅警報燈都未可以普及去裝，因為要經好多部門，點解佢哋唔可以急人所需先呢？呢度都30幾萬票啦，好過嗰啲拎幾萬票就話自己代表香港吖！」

另外，麥長青透露因為中國政策問題，原本9月要返中國拍劇亦被延遲，笑言要趁機減肥：「我想減30磅，o依家210磅呀，肚腩頂住綁唔到鞋帶。」提到林盛斌（Bob）早前要入院通波仔（新聞連結： https://bit.ly/2BZaqfv ），佢祝福對方身體健康：「我都明，我哋有家有室，真係會怕死㗎！」

至於同場嘅楊思琦，於劇中飾演老師：「我嗰時都係實習，冇實戰經驗，不過自己對教小朋友都有興趣，但係屋企都有一個要我教啦。」佢仲話曾經諗過開playgroup，但要配合師資、教材同場地等，假如得自己營運就做唔掂。

問到落選港姐工藤佑采表示選美期間，要於短時間內學4種舞蹈（新聞連結： https://bit.ly/2NHX7Bw ），楊思琦話：「係要同時學好多嘢㗎，好密集，係有難度嘅，所以就要練好多次。」至於有網友指要求落選港姐三度上台跳舞暖場，問楊思琦會否覺得有點殘忍？她笑謂：「隔咗咁多年，我唔知新嘅人係點諗，但係我哋嗰個年代就覺得好開心，可以上台展現成果。」另外，佢表示病咗4、5日，仲發燒至104度：「o依家睇嘢都浮下浮下咁，不過已經退咗燒。」

精選娛聞，喺晒《娛果》
http://fb.com/appledailyent