要了解國際金融政局大勢，有兩個Twitter一定要睇，一個係特朗普；另一個係《環球時報》總編輯胡錫進。冇錯，《環球時報》，即係中共喉舌報。胡錫進嘅Twitter，已成功「預言」中國幾次質易戰行動，甚至被國際市場稱佢為「Chinese Communist version of Trump's Twitter」。

呢位「中國代言人」胡錫進，今日就分別喺微博同Twitter上講到一個論調，就係：

「大陸有誰願意香港失去它的資本主義特色，變成一個與內地很像的城市嗎？反正我不願意。我希望堅持『一國兩制』，香港保持它以資本主義制度為基礎的獨特社會風貌。我覺得那樣的香港才有意思，值得內地人去看，把它內地化，中國會失去多彩的一個維度。」

講得好有道理…好似！不過，作為中共喉舌，佢接落去嘅推論係，香港被西方政客愚弄，搞亂香港之類…在此不贅。

的確，由2003年反廿三條，2012年國教；2013年政府無理不向港視發牌；2014年雨傘運動；到今日反修訂逃犯條例。每一次香港人，走上街頭，正正就是要維持香港的獨特性。

論金融市場，中港早就融合，「港股A股化」、「中環變中資天下」此等現象，早幾年就已經出現。怕就怕中港金融商業市場，不再只是「融合」，而是聽命於中央。你會話，咁又點？如果以下事情發生喺你身上，而你欣然接受，那我無話可說。

1：2015年大時代後，A股冧檔，阿爺一聲下令：暴力救市！於是邊個沽空，就係「惡意沽空」，公安部更進駐中證監嚴查，結果「恐慌性」挾升！想沽又沽不得，一沽就話你操縱市場，仲要逼你掃貨，你接受到嘅，我冇嘢好講。

提一提，當年曾有13間私募基金聯署聲明，齊齊唱好股市，之後有過百家公募基金表態維穩股市。唯一唔肯出聲嘅，就係「私募一哥」徐翔。

當日中方曾邀請徐翔參與救市，但佢認為，「參與救市將不可避免地接觸到一些關鍵的內幕信息，這對私募基金管理人來說非常危險」，所以拒絕。之後佢下場係點？因內幕交易罪被判刑5年半，並沒收過百億元資產。

2：貿易戰，特朗普出Tweet指多徵25%關稅，股市大跌，但當日所有傳媒，要到收市後先准報。當日大批內地網民狂呻，「要死都給我個死因」。股票市場，訊息流通尤其重要，但中共政權下，股市都是「讓領導先走」；甚至分析師收晒Order唔准評論貿易戰對股市影響，投資者根本無從獲取持平分析，睇唔清全盤局勢，惟一睇得清嘅人，就只係有勢力人士。你接受到嘅，我冇嘢好講。

3：近期，內地近日大幅收緊言論，多個財經自媒體據報被封。至於內地知名財經網站《華爾街見聞》一夜被禁，即時摺埋，但當局未有詳述被「冚旗」原因。
話說，周日《蘋果日報》報道，港交所（388）前高層疑涉貪，協助不完全符合上市要求的公司通過新股審批，並每隻要求逾千萬報酬。呢單新聞，《華爾街見聞》亦有引述報道。

如果咁你都接受到嘅，我冇嘢好講。喂，你唔睇公義份上，都睇你銀包份上呀，家陣打劫喎！

你可能會話，《逃犯條例》修訂下，移交門檻調至刑期7年。不過，據國內最新通過的刑法，「散播謠言」可被判處7年監禁。一旦通過送中，以上情況，你覺得真係唔會喺香港出現？

by千頌C@堆填區
http://fb.com/winbigwok