松景科技（8013）兩個月跌近50%，殘到爆，預期PE係超低單位數，有得諗。松景主打XFX品牌顯示卡，自家品牌好銷得，07年度（6月底止）純利，就增長咗27%到3564萬港銀。
呢期大行花旗估計，全球個人電腦提升周期剛開始，為期一至兩年。隨住電腦提升周期開始，對電腦周邊產品配套，自然有需求，松景食住個勢，短期已經唔使憂。又研究公司IDC亦預期，亞太區網上遊戲市場規模，到2010年前會擴大兩倍。網上遊戲龐大增長潛力，先最煞食，松景顯示卡產品，肯定長做長有。松景08年度純利，係咁意維持07年度增幅，純利4526萬銀，預期PE低見6字頭。以松景預期PE10倍做目標，股價要見0.69元，代表現價（0.45元）要翻半番，抵博。

華人大折讓抵玩

香港華人（655）最新NAV2.87元，現價（1.89元）折讓34%，港股狂牛，連傳統地產股都熱爆，華人仲有咁嘅折讓，已經抵玩。
又華人上年投資東亞區房產基金LAAP，區內股市同固定資產升值不菲，華人投資LAAP食到應一應，肥過肥仔水。華人重秤後NAV，應該上到3.3元，折讓上到43%，吸引到爆。華人折讓收窄到20%，要見2.64元，潛在升幅接近40%。
錢雋