香港工商界慶祝十一國慶籌委會，年年都會喺國慶前搞大型活動，廣邀各界好友出席。今年佢哋已經定咗喺九月二十七號中午，喺金鐘港麗酒店舉行酒會，同時又會喺九月二十三號至十月五號兩星期內，喺中環會所外掛燈飾祝賀。
要搞到個活動好好睇睇，梗係要使唔少錢啦，本港工商界每年喺呢個項目上，都揼唔少錢出嚟㗎。但今年工商界就唔使畀人揼心口喇，因為上年嘅籌委會喺財政上做得好好，竟然淨低成三十二萬咁多，比起佢哋嘅二十六萬預算多咗好多，咁梗係唔使再募捐啦。

委員發出會心微笑

當籌委會主席霍震寰噚日喺籌備會議上宣布呢個好消息時，出席嘅其他委員都發出會心微笑，應該都係慶幸今年嘅荷包唔會突然少咗一筆啩！
國慶年年有，慶祝活動就年年搞一次，八方每年都會去啲慶祝酒會湊吓熱鬧，名人高官星光熠熠，之但係，最難忘嘅一次唔係因為見到邊個官或者個場有幾豪，而係嗰年國慶新聞界酒會請咗當時好紅嘅小燕子趙薇做表演嘉賓，佢班fans就熱情咯，搞到啲實蕉哥哥鬼咁緊張，最後要開個後門佢行。嗱，想啲後生主動關心吓國慶係乜順便嚟個公民教育，就要請啱嘉賓喇。

傳真︰2623-9278
電郵︰[email protected]