恭喜81歲嘅「舖王波叔」鄧成波抱孫。佢最錫嘅孻仔鄧耀昇（Stan）與太太葉靄璇（Vicky）結婚兩年，第一個BB上星期出世，BB女重7.2磅。
Stan今年30歲，係舖王波叔嘅第五仔，亦係外界最為認識嘅一位。Stan話，佢哋婚後一直跟波叔同住，波叔好錫新抱，對Vicky百般照料，成日叫Vicky唔好返咁多工，不過Vicky都係上月尾先至正式放產假。
今次第一胎係女，問佢會唔會追番個仔，Stan笑住話，太太生到幾多得幾多，冇上限，似乎佢哋都真係好鍾意小朋友。
原來Stan同Vicky係中學同學，不過Stan中二已經飛去英國升學，二人冇聯絡多年，幸得facebook將佢哋從天各一方再拉埋一齊。兩口子近年一齊孖住搞婚禮統籌公司「拉斐特」，Vicky生女之前依然積極工作，唔似打算做全職主婦喎。