當年今日
關於我們

【唔同女人坐】隔咗成年仲嬲緊 宮雪花見到夏蕙BB即刻嘴藐藐

蘋果日報 2018/03/03 19:28

魏秋樺黃夏蕙宮雪花劉錫賢葉家寶

宮雪花、魏秋樺、葉家寶、劉錫賢、王瑋、黃夏蕙等,今晚喺佐敦出席「亞洲會新春聯歡暨五周年會慶晚會」,仲記唔記得前年夏蕙BB擺壽宴時,爆出花姨同邵音音爭位坐嘅新聞,當時花姨回應話係俾夏蕙BB寃枉,仲話要夏蕙BB道歉。
隔咗成年,花姨嘅仇恨一啲都冇減退,今晚見到夏蕙BB,即刻擺出一副嘴藐藐樣,簡直將「唔滿意」三個字鑿咗喺額頭。影大合照時,花姨點都唔肯企埋一齊,要魏秋樺成班人囈先肯影,但影嗰時個樣都係好唔情願,全程藐嘴,又硬拉肥仔劉錫賢企隔離。問花姨係咪到o依家都唔肯同夏蕙BB影合照?佢即避開話題:「我哋中間隔咗人。」咁係咪唔肯合照?花姨撒嬌話:「點解今日要講呢啲嘢,唔好提啦!」
講到今晚嘅晚會同邊個座?花姨話:「我同家寶講同我坐,唔同我坐,我就即刻走,我嬲家寶,叫佢同我坐,佢猶豫緊。」另一位呢?花姨再話:「肥仔(劉錫賢)。」點知劉錫賢喺側邊聽到,即刻落閘:「吓!我做司儀,唔得喎。」花姨堅持話唔可以有女人坐佢隔離,要男士保護佢,跟住又話:「唔好講呢啲,講派糖啦。今年我會考博士,想做一個有才華、美貌集一身嘅亞姐,到時會讀中國歷史、中國文學同中國性教育,要上堂考試,好難考㗎!好深。」使唔使實習?花姨話:「冇,只係寫論文,唔好諗埋一面,中國性教育係講繁衍同移民潮。」
精選娛聞,喺晒《娛果》
http://fb.com/appledailyent
empty
宮雪花、魏秋樺、葉家寶、劉錫賢、王瑋、黃夏蕙等,今晚喺佐敦出席「亞洲會新春聯歡暨五周年會慶晚會」。
empty
花姨嘅愁恨一啲都冇減退,今晚見到夏蕙BB,即刻擺出一副嘴藐藐樣。
empty
影大合照時,花姨點都唔肯企埋一齊,要魏秋樺成班人囈先肯影。
empty
花姨話:「我同家寶講同我坐,唔同我坐,我就即刻走。」