【新增內容及圖片】

目前正服兵役嘅韓國男團JYJ 30歲成員朴有天，將於8月尾退伍，不過噚日就爆出婚訊，指佢9月20號將同圈外人結婚，隨後未婚妻亦迅速被起底，據悉係現年27歲、韓國南陽乳業家族嘅外孫女黃荷娜。婚訊曝光後黃荷娜曾一度關閉Instagraｍ，不過隨後又開返，並於今日上載米奇米妮親吻照，寫道：「0910請祝福我們！」疑似自爆婚期就是9月10號，雖然佢及後秒刪照片，不過就令外界都以為兩人將婚禮提早至9月10號，對此朴有天方面僅表示「唔清楚」。

據朴有天方面透露，佢同黃荷娜去年認識並陪伴佢度過捲性侵案嘅難關，於今年初開始拍拖。由於婚訊太突然，外界即刻有唔少傳聞，甚至有傳兩人係奉子成婚。雖然朴有天及黃荷娜未就「奉子成婚」嘅傳聞做回應，不過女方懷孕一說有跡可尋。據報道指活躍喺IG嘅黃荷娜，曾於今年嘅愚人節留言表示「想結婚」，而黃荷娜喺幾日前自爆1個月內重咗14.3磅，又話「臉都變大咗，身體就更加唔使講，啲衣全部都唔啱着」。不過喺黃荷娜之後公開嘅影片中，依然見佢照喝啤酒，未有戒口，未婚懷孕一說似乎有待商榷。

同時，黃荷娜繼續被網民起底，上載到Blog嘅照舊都被翻出，網民指身為富三代嘅佢交遊廣闊，與同屬JYJ嘅金在中、Super Junior成員金希澈都關係密切。網民指翻出嘅照舊中，有佢同與金在中着同款皮草大褸嘅相，亦有攝於金在中屋企嘅相，而且黃荷娜曾公然上載金在中私下食煙嘅相，當時曾遭唔少粉絲謾罵。而黃荷娜同金在中有關嘅舊照曝光後，有網民推測黃荷娜係咪曾經同金在中交往過，隨後先轉投朴有天懷抱。

網民翻出嘅舊照仲包括黃荷娜同金希澈外出食飯嘅相，黃荷娜更扮小鳥依人咁挨住金希澈，引出更多猜疑。不過亦有網民認為黃荷娜同金在中、金希澈等人都係朋友，係朋友間相處嘅模式，只係後來先同朴有天撻着，認為大家唔使「過度發揮想像力」，令事情變得複雜。