《南華早報》嘅新聞一波未平，一波又起。

繼極之喜歡梁振英施政嘅南早副老總譚衛兒，將於明年1月坐正做老總後，市場又有傳出，內地富豪馬雲嘅阿里巴巴正討論入股《南華早報》，日前另有傳聞指，今次收購唔排除係全面收講，令馬雲將成為南早嘅新老闆，現時大老闆郭鶴年家族將逐步退出。八方問過阿里巴巴同南早發言人，兩邊都不評論，大家對呢啲傳聞都係聽住先。

之不過冇正面回應，唔等於南早嘅員工冇反應。江湖傳聞，南早唔少人對日讚夜讚CY嘅譚衛兒極有保留，士氣甚低落，家吓仲傳出內地第二首富馬雲入股？南早編輯同記者又點會唔擔心日後編採方向呢！南早近日多個部門流失情況嚴重，公司仲未請番人填補。對南早嚟講，呢個秋天，可謂多事之秋。