ViuTV在《全民造星》後精選出12人男團「MIRROR」，緊接有另一四人組合「ERROR」成軍，由肥仔（梁業）令軍，聯同何啟華（阿Dee）、郭嘉駿（193）、吳保錡一齊硬撼「MIRROR」，四人改編咗「MIRROR」歌曲《一秒間》變為佢哋出道作品《404》，歌詞表達完全踩住上，仲聲稱佢哋四人先係真正偶像組合，為咗令件事更爆，ERROR仲諗咗條橋，早前193到大台門口自稱係明星跳舞，嘗試勇闖入內見工，並將整個過程錄低制成惡搞片段，當然門口保安當佢白撞，片段出街後激發網民注意ERROR，覺得夠晒玩嘢。

ERROR日前在九龍灣接受訪問，言談間不斷勁踩MIRROR，而且大玩無厘頭，回顧193去大台門口拍片，佢話：「我性格覺得自己靚仔似明星，跟呢個方向去玩，試下去玩見工，幾年前我真係去考過藝訓班，最後一round被淘汰，諗住再試多次，可惜唔得，保安要我登記，從未聽過明星要登記囉。」佢哋仲爆有個情節係193跪求保安，但因涉及法律問題太踩界，唔敢出街，驚連累老闆坐監，大家份約凍過水。

喺片段中見到193面懵懵，佢話：「一世人冇做過咁低能事。想每段片比上一段更黐線，最初都有抗拒，要去人哋個台做啲咁黐線嘅事，去之前都專登喺屋企對鏡練習，發覺自己對住塊鏡都接受唔到，咁就OK。」193又話本身諗咗好多對白，例如玩食字「我高過馬鐘德」、「樂小姐同玲姐叫我嚟見工」等，但臨場膽怯講唔出。其時另外三位組員就坐喺另一方車廂睇住193表現，保錡話：「好好笑，佢對住人跳舞跳得興高采烈，保安俾佢搞到呆咗，完全ERROR冇咗反應。」

ERROR強調佢哋行緊主流偶像派路線，同MIRROR行緊偏風有異，仲話：「作為兄弟點都會踩住佢哋去上，令我哋再去一個更高地位。」193語帶諷刺為MIRROR打氣：「希望佢哋可以跳出comfort zone耀眼光芒啦，加油呀呢班契弟。」阿Dee則話：「基本上ERROR就係我哋方向，即係冇方向。」四子有不同才華，肥仔跳舞勁眾所周知，阿Dee在創意上最有發揮，193竟膽敢挑戰姜濤又抽陳偉霆水，自認跳舞出色話：「人哋叫我將軍澳陳偉霆，唔係受唔起呀？我喺組合中走偶像路線，係樣貌擔當，可以硬撼姜濤。我係ERROR姜濤大家好sa lang hei yo。」又揶揄MIRROR十二人咁多，觀眾會睇唔到佢哋。

一講到保錡有咩勁佢就話：「我諗我才華就係冇才華。」隊長肥仔忍唔住爆：「保錡係零死角，由頭到尾360度都係咁廢一個人。」其他組員都一致認為保錡係完美ERROR。保錡自白參選時負評如潮，又被指貌似八兩金，一聽到呢個名字即接位話：「喂……我叫保錡呀。」原來背後佢都有唔開心，幸好被大家訓練到佢接受呢個稱呼，佢話：「咁大個仔都未俾人叫過咁偉大名字，之後諗通咗，我袋咗佢名號，跳出嚟綻放耀眼光芒。」

組合出道就有機會同監製花姐去日本拍攝節目《花姐ERROR遊》，四人帶花姐去旅遊同時挑戰花姐底線，四子當然好開心咁快有屬於自己節目，對比之下ERROR就冇MIRROR強大幕後團隊，好多關於創作以至服裝形象都要一腳踢，肥仔話：「調轉睇，係我哋可以做自己鍾意做嘅嘢，好多天馬行空，唔犯法唔坐監就得，自由度好大。」佢哋都知道公司資源擺放喺MIRROR上更多，但冇唔開心，肥仔話：「你諗番用咁低成本做到咁多事，更有成功感。」阿Dee就覺得做到刀仔鋸大樹好開心。

精選娛聞，喺晒《娛果》
http://fb.com/appledailyent