數一數只剩餘七次賽事今個馬季正式結束，最緊扣馬迷心弦肯定係潘頓、雷神為爭奪冠軍騎師，施展渾身解數，度馬時大部份馬迷肯定會先考慮兩位高手座騎。

可是此種情況卻引伸出一面倒傾斜局面，始終跑馬應該以馬為先，馬匹若冇能力，即使配誰亦難扭轉弱勢！

有個別已贏夠數馬房，安排旗下馬密跑目的求減分下季用，相比仍未夠數馬房較值信賴，鄭俊偉現時14W在手，只差兩W肯定無難度。

尤其禮拜日（24日）頭場匆匆加程再戰的「如沐春風」，前仗1600米輸近後，上周即強配潘頓，但臨場票數尷尬結果由廐侶「總統至上」落飛爆冷取勝，不過「如沐春風」雖敗但走勢其實不差，好明顯此匹不敗馬王「范高爾」子嗣偏向均速型。

今次加程跑2000米絕對有理由，蓋本身來港前於英國已跑過早有經驗，輪到擔正交代極合理。

另一個未夠數馬房李易達今次亦有多匹實力馬，當中可吼與「如沐春風」同主的第二場「駕迅」，季內九戰只得兩P，評分已降低至上季贏同程的34分。

睇番近四仗1400米均輸近，反映狀態跑起只在等機會交代，今次有利之處在於同場識贏對手不多，對「駕迅」來說應該係賺到形勢。