薛家燕今日為節目《家燕姐全民皆friend60年》進行錄影，話晒全民皆friend，所以佢亦請埋佢喺圈中一班好朋友，包括有胡楓、曾江、李司棋、劉丹、滕麗名、王君馨等等逾三十幾人嚟做嘉賓，可以話係星光熠熠。

家燕姐表示自己為咗呢個節目，既興奮亦緊張到瞓唔着：「我個女仲擔心我咁早番嚟綵排錄影，精神會頂唔順，不過好彩我都精力充沛。」而家燕姐仲自爆十二月舉行嘅演唱會，請嘉賓方面已經碌爆人情卡，至於演唱會rundown方面，早前高登討論區有「慈雲山鄭列瓊」之稱嘅瓊姐，幫佢設計咗個瘋狂跳十字步同不斷「唏牙唏呀希」嘅rundown，家燕姐仲講到明會參考，仲話月中會開始專注訓練體能同籌備綵排。

喺劇集《真情》入面做家燕姐新抱嘅滕麗名表示，自己當年拍《真情》時仲係新人：「成日要拍同家燕姐抱頭痛哭的情節，試過因為NG4、5次，搞到好大壓力。」提到今日錄影，阿滕更表示因為趕入廠，搞到俾人影快相：「因為怕遲到，我仲叫個交通警抄快啲。」

另外，當年喺《四個小生去旅行》記者會上被謝賢掌摑嘅曾江（相關新聞： https://bit.ly/2Nq1HaK ），就自爆大家只係演戲：「全部都係被安排嘅情節，大家係演員，都知被掌摑但就唔知幾時出手。」而佢更話自己同謝賢到o依家都仲係朋友，仲成日約飲茶。至於修哥（胡楓）就話已經約咗契仔黎明：「相信好快可以見到契孫女，我睇到契孫女網上嘅相覺得似爸爸，好可愛。」而佢仲透露已經準備咗個好大嘅利是封，嚟封利是俾BB。

早前報道：
自爆做戲摑曾江　失戀謝賢呻十足過監躉生活
https://bit.ly/2wXmjgc

精選娛聞，喺晒《娛果》
http://fb.com/appledailyent