【新增短片】
被視為司局長搖籃嘅專資會尋晚舉行11周年晚宴，一如過往唔少司局長捧場，唔少得當然係娛賓環節，每年都有唔少會員上台獻技，今年當然唔例外，除咗龐朝輝醫生，仲有特別嘉賓立法會議員容海恩。佢哋唱咩歌？之咪就係李克勤同關淑怡合唱嘅《只想你會意》。向來好鍾意唱歌嘅容海恩，喺台上唱得好肉緊，唔知唱歌同做議員，佢鍾意邊樣多啲呢？

運輸及房屋局局長陳帆都有喺大合唱時一齊上台；唱咗首乜嘢歌？就係香港人耳熟能詳嘅《獅子山下》，聽佢唱起來中氣十足，相信平時都有下苦功。八方之後問過佢係咪只得一首飲歌？佢話唔係，仲有許冠文嗰啲……其實係咪想講許冠傑呢？