【新增內容】

南生圍噚日發生山火，燒咗17個鐘後終於撲熄（新聞連結： http://bit.ly/2DqmRN6 ），南生圍係唔少香港劇集及電影取景嘅地方，繼楊思琦心痛香港後花園被毁後（新聞連結： http://bit.ly/2FLdrRw ），就連大台嘅「大小姐」林淑敏及蕭正楠都感到可惜。

其中林淑敏向傳媒表示：「我有去過南生圍拍嘢，外景勝地嚟㗎！古裝、時裝都要去。好可惜呀！香港唔係有好多咁嘅地方，越嚟越少，我仲記得佢嗰時有個街渡可過河，畀5蚊一次，咁天然嘅地方，香港越嚟越少，o依家燒咗，希望政府可幫手重建番呢個地方。」而林淑敏早前拍大台未播放嘅新劇《棟仁的時光》時，有一幕講佢同張國強囝囝郊遊，就係喺南生圍拍外景。

至於蕭正楠回應傳媒時就話：「南生圍係TVB拍最多外景嘅地方，《翻生武林》3個月外景，連續十日八日係嗰度拍，嗰度係真係好靚，星期六、日，係好多市民放直升機、踩單車、釣魚、影婚紗相，o依家咁樣燒咗，都幾可惜，拍外景亦少咗個地方，其實真係好有感情，咁多年好多時拍外景都係嗰度，有條木橋睇住佢重建，睇住佢爛又重建番，所以相當有感情。」

而黃翠如亦有回覆傳媒，佢話：「好多套劇係南生圍拍，尤其係古裝片，基本上我拍每一套，無論係古裝或者時裝，以前同韓國電視台合作一套韓劇，個男演員係南生圍拍，嗰時韓國攝製隊來到都話南生圍好靚，所以香港所有我哋僅餘嘅大自然環境，希望可以好好咁保護住佢。」

薛家燕亦表示感到可惜，佢話：「過去好多劇喺南生圍拍攝，香港好難搵到自然又靚環境，佢啲禾稈草好高，有風吹，拍劇情片係好好，又有山又有水，o依家燒咗又少咗拍外景嘅地方，好可惜。」

另外，仲有影壇型男任達華都對南生圍被火燒感到可惜，佢話：「好可惜，呢個係我哋晨早、黃昏都好靚地方，我以前好多戲喺度拍，好似《鐵三角》，好多電影喺裏邊拍，我哋喺入面留下好多腳印，因為嗰度啲蘆葦草實在生得好靚，嗰度單車徑好靚，我有時自己會入去踩吓單車，等吓黃昏，見到蘆葦草吹吓真係好靚。希望大家珍惜吓呢個地方，以後小心啲，注意吓山火。」

蔡瀚億（BabyJohn）就話：「唔止《救殭清道夫》，我仲有幾部電影係嗰度拍過，有時放假都鍾意去嗰度行，大自然環境好靚，好可惜。最心痛好多動物鳥類係度生活，呢場火令到佢哋受到生命危險，甚至死亡。亦都希望珍惜大自然環境，係地球上買少見少，希望大家珍惜。」至於譚耀文希望被燒毁嘅地方可以盡快回復：「可惜一片草地燒成咁，南生圍真係好有特色，曾經好多電影喺嗰度取景，希望草可以快生長番出嚟。呢次係一個好驚惕，大家要注意山火，不幸中大幸係冇人受傷。」

精選娛聞，喺晒《娛果》
http://fb.com/appledailyent