日本電影《字裡人間》嘅34歲男星松田龍平，今年初被爆婚姻出現問題，其29歲混血模特兒妻子太田莉菜疑背夫偷食一名年輕男星，當時已盛傳松田龍平決定離婚。直至今日，男方事務所宣佈結束8年零11個月婚姻，並由松田龍平及太田莉菜聯名發聲明表示已得共識決定離婚，據知雙方是和平分手，任何一方唔需要付上贍養費，但就未有提到8歲女兒今後嘅撫養權。

其實今年3月已有消息指，太田莉菜前年開始玩失踪，與一名年輕男星關係親密，佢哋夫妻二人早已分居，當時已有報道指松田龍平待拍罷《四重奏》就簽紙離婚。不過，二人婚姻一度出現曙光，龍平在3月12日喺Instagram上載太田莉菜近照，並留言：「對我很重要的人，更是個好厲害的母親。」貼文一出，連龍平胞弟松田翔太都回應：「我也喜歡她。」及至夏天，龍平被拍得同太太恩愛帶囡囡去公園玩，貌似已和好如初，可惜最終都係離婚收場。

更多娛聞，喺晒《娛果》
http://fb.com/appledailyent