賣座日本電影《死亡筆記》唔止捧紅「L」松山研一，飾演「彌海砂」嘅青春女星戶田惠梨香喺戲度同樣搶戲，令佢哋齊齊走紅，仲發展埋地下情，都係戶田老竇事後接受訪問至踢爆呢段陳年舊情咋！

戶田多段戀情都相繼撻Q，出名又瘦又平嘅佢，上年剪短頭髮後，睇落去更加憔悴，大家都擔心佢係情傷搞成咁。其實戶田今年只不過得26歲，佢為富士台嘅特備劇《世界奇妙物語》演出，呢個單元故事噚晚播出，佢同男拍檔平山浩行扮演情侶，戶田明顯已青春不再，仲畀唔少網民話開始有老態，而一身造型更似足一個中年女人，都咪話唔悲哀。