【大灣區人】係福定係伏?人力陳志全VS人大洪為民
陳志全同城化粵港澳大灣區大灣區人洪為民
粵港澳大灣區規劃未出台,特區政府以致建制派已全面唱好,認為機遇處處,部份民主派對則有保留,憂心「同城化」令香港被矮化。《蘋果》邀請曾撰文力撐「大灣區人」說法,呼籲把握大灣區機遇的港區人大代表洪為民,以及主動積極了解大灣區細節,但對此發展概念態度保留的人民力量立法會議員陳志全對談,拆解大灣區是「福」是「伏」,說到底兩人均認為,無非是「信心」的問題。
洪:其實我係預測可能20年、15年後,我哋大灣區發展都會一樣,好多嘢係integrated(融合),可能我朝早喺香港、下晝喺深圳、夜晚喺廣州,所以未必再咁介意話自己係屬於邊一度人;無衝突嘅,你既係灣區人、亦都係香港人,正如你可以話你係加州灣區人,同時係三藩巿人一樣,不過就多咗人可以講一個咁樣嘅概念,唔需要再去分exactly係邊個巿或者county(郡)。
陳:我哋講緊嘅係港人治港、高度自治,當你話我哋連香港人都唔叫、叫「大灣區人」、要受大灣區規劃去影響我哋嘅生活,咁我相信從文化、政治上,好多港人都會覺得唔舒服。當然發展大灣區,好多配套嘅政策,香港人會得益或者會方便,但與此同時其實都係要付出一定嘅代價,我哋擔心就係呢啲代價或者所造成嘅損害係不能逆轉,所以我會叫大家唔好單方面盲目唱好,要謹慎提防。
問:大灣區規劃被指有政治目的,如此融合會否損害香港獨有角色?
洪:如果(香港)無咗自己定位,其實你想參與,人哋都唔摻你玩啦!粵港澳大灣區點解咁獨特,點解唔係杭州灣區、點解唔係渤海灣區?因為我哋有一國兩制,就係因為我哋係香港澳門,我哋有一個國際化元素同一個國際金融中心,呢啲係好多地方無,中國內地固然無。當然我哋有我哋嘅困難,因為一國兩制本身係要克服嘅嘢,因為兩邊通關已經不便利…呢啲嘢我哋要慢慢諗,點樣喺呢種咁嘅情況下繼續發揮優勢,我睇唔到任何意圖,會令香港無咗自己嘅獨特性。
陳:香港同內地城巿必須有區隔,舉例買奶粉,大家唔會搶住去廣州、深圳買,佢哋嚟香港買奶粉,係因為覺得香港同其他鄰近城巿有唔同,有品質保證同信心喺度,咁大灣區9+2融合後,內地其他城巿去睇香港,仲有無過去嘅優勢呢?有人話大灣區將我哋認證制度嘅高標準,去影響其他城巿,但你驚唔驚調返轉頭,係同化咗香港,令香港都係咁鬆散、都係咁容易造假?有時係愛你變成害你,我覺得香港要保持一定程度嘅區隔,我諗都係內地好多巿民嘅心願。
問:本土經濟發展是否已沒出路,年輕人必須北上才有機會?還是旨在「換血」,人口轉移?
洪:香港過去產業單一化,傳統產業萎縮緊,大灣區係多咗個腹地,畀大家去發展,產業有機會更多元化;(大灣區)就係多咗種唔同選擇,但記住嗰度嗰啲唔係低端人口嚟,係一啲叻人…以前我係聽過大灣區「養老論」,對唔住,我去考察過,我見過啲書記巿長,人哋無興趣畀你嚟買層樓喺度退休,我聽過,(佢哋)話唔係好想賣層樓畀你,因為你用嚟退休,我諗住你嚟創業、就業喎,其實宜家大家係追緊呢啲咁嘅嘢,我哋要不斷提高自己的競爭力。
陳:政府應該諗下點樣發展本土產業,有時依賴咗一啲市場,但國家政策會變、外圍環境會變,到時返唔到轉頭,唔識喺自己嗰度搵食;洪生不斷強調係個人自由選擇,我係怕當香港人等唔到公營房屋,我哋年輕人失業率又高,啲年輕人搵唔到想做嘅嘢,有時無得揀,如果嗰邊有機會、或者有間屋大啲,可能真係被迫遷移去大灣區,呢個係咪令我哋政府唔使再用香港嘅資源、土地,去滿足香港人面對嘅需要呢?好似畀一個卸責嘅機會同籍口畀佢咁囉。
問:雖然成立了粵港澳大灣區建設領導小組,但能否真正擺平各巿利益?香港會否蝕底?
洪:巿同巿之間(要)擺平就好難,最多係做大個餅…喺增量上、我哋發展新嘅嘢裡面,有啲嘢互補。韓正做組長好大意義,因為佢係政治局常委,亦係副總理,好多部委佢都可以協調同去管,如果你搵其他副總理,佢哋係分管,管金融嗰個管唔到交通、管交通管唔到基建,韓正就可以管得晒,佢有能力去協調;當然唔容易,因為大灣區好多問題唔係香港同廣東省傾掂就得,好多係國家體制問題,好多嘢係(牽涉)中央部委。
陳:支持嗰啲就覺得一錘定音,但對香港人嚟講,始終呢個就係我哋會某程度上被中央規劃,佢嘅規劃會影響你、而唔係你嘅選擇,佢會唔會有文件落嚟(香港)去做諮詢?即使林鄭做咗組員,就算畀咗副組長佢做,但香港人喺成個大灣區嘅發展過程、政策制定過程,究竟個發言權係點?林鄭會唔會從香港人嘅角度去爭取最大利益?我哋唔知道,決策前亦都唔會先諮詢香港人嘅意見。
洪:我覺得信心係要慢慢去建立嘅,正如改革開放初期,我好多朋友都唔願意返內地投資,連物權法都未有,我做資本家,你充公咗點算啊?但事實證明咗,願意去嗰班,當然都有人損手爛腳,但好多今日係香港最頂層嗰班,都係因為改革開放而得益…正如林鄭所講,香港係改革開放嘅主要貢獻者、亦係主要得益者,大灣區都一樣,你唔信,你咪睇吓先囉,無話你聽日要去,但去嗰班,你就唔好去阻住佢、唔好拉住佢,話會死㗎、會割咗個腎,我哋起碼咪去睇囉,一定有班先行者。
陳:講到信任問題,我宜家對特區政府都有好大問號,何況係大灣區其他政府或者呢一個建設領導小組?係咪真係諗啲嘢會對我哋最好?洪生話信任要慢慢建立,但宜家就係好薄弱,你就要縛住我哋一齊,咁就會惹起一啲巿民反感囉。如果你畀我揀,我就揀唔使結婚、唔使擺酒,我哋好似以前咁樣,有機會就北上交流,我覺得特區政府,佢唔能夠只睇一面,佢應該正面或反對都要話畀香港人知,未來要緊守乜嘢,宜家好似只識叫人信、信者得救、執輸行頭慘過敗家、擁抱大灣區咁。
《蘋果》邀請曾撰文力撐「大灣區人」說法,呼籲把握大灣區機遇的港區人大代表洪為民(右),以及主動積極了解大灣區細節,但對此發展概念態度保留的人民力量立法會議員陳志全(左)對談。黎樹雄攝
洪為民(右)坦言大灣區為港人提供了多一個選擇,是否相信機遇處處,說到底是一個「信心」問題。黎樹雄攝