航空業復蘇，業界員工做到踢晒腳，美國西北航空（NorthwestAirlines）早排話，由於好多機師請病假同曠工，迫住取消部份航班。有網友喺《MSNBC討論區》問：「點解咁多人一齊請病假？唔通呢間公司嘅勞資關係出現問題？」
BDinWASHINGTON回應：「西北航空人手嚴重不足，令機師工作壓力好大，唔少人捱到病，加上人工低福利差，班機師為咗表達不滿，於是集體請病假。」

USAirwaysabuseofemployees講：「其他航空公司對員工一樣咁差，我老公做咗24年機師，一直盡忠職守，但公司幾年前居然大幅減薪，仲增加飛行時間，令佢捱得好辛苦。同人唔同命，行政總裁不但人工高，仲做得好舒服，真係唔公平！」
BDinWASHINGTON話：「機師通常要有大學學位，仲要接受好耐培訓，咁都不特止，佢哋要輪班，經常日夜顛倒，冇乜時間陪屋企人，仲要打醒十二分精神揸飛機，因為所有乘客嘅生命都喺佢手上，所以機師應該加多啲人工。」
西北航空為咗擺脫破產保護，舊年大幅減薪，推行新工作制，仲增加機師嘅最高飛行時數，由每月80小時增至90小時。
唔少機師因為頂唔順，今年夏天請好多病假，令公司人手不足，被迫取消幾百班航班，令公司聲譽嚴重受損。