張智霖(Chilam)、胡杏兒、陳瀅及童愛玲等，噚晚喺尖沙嘴出席一個品牌嘅25周年展覽開幕禮，身為品牌亞太區大使嘅張智霖同着住1.5吋踭鞋嘅胡杏兒一齊接受訪問，杏兒預產期係10月尾。

Chilam話都有儲錶習慣，有個夾萬放手錶，杏兒話最貴嘅錶唔過7位數，就畀身邊嘅Chilam取笑佢係小富婆，杏兒話：「買錶都係用嚟獎勵自己。今次同胡說八道會去拍節目好開心，因為機會好難得。特別係戴住姚子羚男友(鄭子邦)面具扮求婚。其實我都好替姊妹心急。」佢又大爆有胡說八道會姊妹即將出嫁，不過就唔肯講係邊一位。

Chilam有睇杏兒嘅節目，見到杏兒個大肚有似曾相識感覺，好似太太阿靚當年陀BB，佢話：「以前佢好有侵略性，現在變得溫柔有媽媽樣，好有女性光輝。」講到分享湊仔心得，佢話學校嘢盡力，亦知道杏兒讀書叻，所以會有DNA遺傳。杏兒就話同老公唔會係怪獸家長。

姚子羚今日回應傳媒指：「No la!」唔通杏兒爆黃智雯好事近……