要數網壇長青樹，唔只「瑞士天王」費達拿，女單一樣有年屆36歲嘅「大威」！周三邁阿密網賽女單8強，威廉絲以直落兩盤7:5、6:3殺退德國「一姐」姬芭，昂然晉身4強，繼年初澳網殺入決賽後繼續呢段奇幻逆緣！大威賽後話：「姬芭打得比上次我哋喺大滿貫4強交鋒更好，但能夠擊敗世界第一嘅感覺實在太美妙。」妹妹莎蓮娜亦喺社交網站祝賀家姐：「做得好！我就知道你會做得到。」

至於同日另一場女單8強，英國嘅10號種籽干達以3:6、7:6、6:2反勝3號種籽、羅馬尼亞嘅哈蕾普，將會同威廉絲爭奪決賽席位；另一場4強就由比莉絲高娃對禾絲妮雅琪。