陳柏宇（Jason）今日到商台宣傳新歌，自爆近日被老婆符曉薇嫌他肥，他說：「佢見到我個大肚腩，而且啲褲全部唔啱着，pat pat好豐滿，其實都冇做gym一段時間，以前都有肌肉㗎，而家就中年發福囉。」因此Jason表示要開始下定決心，重回健身室，無懼疫情肆虐：「盡量小心啲，唔好隨便掂自己口鼻，囡囡都唔會帶去Gym房啦。」

提到早前和老婆到昆士蘭旅遊，Jason稱其實此行是工作性質順道外出遊覽，見當地疫情未算嚴重：「我哋去嘅小島人口密度唔高，所以就無戴口罩，但一樣有提醒自己要勤洗手同注意個人衛生。」問到可有趁旅程乘機造人？他笑言：「有都唔話你知啦！不過的確有計劃追多個嘅，老婆鍾意仔，我想要多個女，始終女比較嗲。」

此外，早前在土耳其跟一位危地馬拉男士譜出異地戀的陳慧敏，今日到商台接受訪問，談到媽媽並不支持這段戀情，並曾因此而有爭拗，她說：「都有啲激烈嘅，但有呢個好好經歷，媽媽又唔係管嘅，都有畀意見，咁而家我唔係結婚走咗去，冇咁極端，我都有交帶，現階段都係隨緣，做好自己。」至於爸爸，她形容對方是救世主：「自從有疫情後，佢同我講『開心就得！』發生呢件事，係會同家人多咗溝通，感情昇華。」問到男友可打算來港見家長？她說：「未，啱啱先開始，係好長遠嘅事，而家仲了解緊對方。」又表示不想令對方感壓力：「佢afford到我會好welcome，唔想逼佢一定要嚟，Long D要好注意溝通。」

採訪：曹家誠
攝影：陳俊強

-----------------------------
第三屆最港電影大獎
按此立即投票
-----------------------------
【武漢肺炎】專頁
全民自救 抗疫資訊盡在《蘋果》