日本游泳名將瀨戶大也今年5月24日宣佈同日籍華裔跳水女神馬淵優佳結婚並且提交咗結婚申請，到星期日佢哋終於東京都港區聖格蕾斯大聖堂舉行婚禮，據報道，瀨戶大也喺婚禮上表示未來唔會喺訓練或者比賽嘅時候除婚戒，仲話「開始嘅時候睇到佢就有力量。」

據悉，呢場婚禮有大約250名賓客，日本泳隊一線泳包括瀨戶大也嘅競爭對手萩野公介都有到場，前輩北島康介以及其他日本體壇名將好似羽毛球女單世界冠軍奧原希望以及里約奧運柔道金牌得主貝克茉秋等等。

23歲嘅瀨戶大也係男子混合泳好手，曾經連續三屆贏得短池世錦賽400米混合泳冠軍，2013年同15年世錦賽實現400混兩連冠，今年世錦賽就攞到400混同200蝶兩面銅牌，至於舊年里約奧運會佢喺400混亦得到季軍。至於父母都係嚟自中國嘅馬淵優佳係日本跳水隊成員，22歲嘅佢今年喺大學生運動會拎到團體銅牌。