C朗賽後就擺咗相上網,話祖記又贏到重要嘅一場,叫大家繼續努力咁話!教練艾基利就話:「我哋上周中有成70分鐘十人應戰,體力好大考驗,都預咗今場會苦戰。我哋嘅變陣效果麻麻,所以我將比真歷同古達度推前,靠晒安利簡恩屏障防線,而貝拿迪斯治後備入替都踢得好好,幫球隊提供到需要嘅闊度。」C朗賽後喺佢ig上載一張今場波有佢份嘅比賽相片,用意大利文話:「Un’altra importante vittoria! Avanti cosi ragazzi, tutti insieme!(另一場重要勝仗!大家繼續團結一心)」(圖) 不過,自從C朗加盟後,正選位置都保唔住嘅保羅戴巴拿,今場就把握唔到機會說服艾基利喇,教練再次話佢表現麻麻:「戴巴拿需要更多比賽時間重拾狀態,目前唔使為此緊張。」 呢邊廂祖記就如入無人之境,但佢哋以前嘅大敵AC米蘭,同日意甲就喺聖西路主場兩度領先下,畀阿特蘭大喺補時逼和2:2,踢咗四輪聯賽只得一勝,排緊第13位。