【Viu TV首季蝕6.8千萬】艾粒開新節目酬勞好 少爺占:當奴都收成千萬啦
對不起 標籤你Viu TV當奴少爺占艾粒
艾粒嘅當奴同少爺占平日不時被標籤指矮同排骨,俾人講得多,佢哋決定透過新節目分析社會標籤人嘅問題。今日艾粒喺旺角為佢哋喺ViuTV主持嘅首個節目《對不起 標籤你》舉行記招,仲搵嚟節目中受訪被社會標籤嘅路芙、杜小喬及阮民安等現身。
路芙喺節目中解構TB分好多種,如嬌嗲TB、男性化打扮等;令艾粒仿如上咗TB深造堂,路芙承認初入娛樂圈時曾聽到唔少帶歧視嘅說話,例如啲人見佢個樣男性化就叫佢換水,至今去女廁都會俾人指指點點。
首次同ViuTV團隊合作,佢哋大讚團隊製作認真,十集節目都拍咗成四個月,過程自由度高又發揮大,佢哋話﹕「每次都五十人出動,成十一部機拍,酬勞又好好。」早前有指ViuTV首季錄得蝕六千八百萬,少爺占笑指當奴都收咗千萬酬勞,佢哋覺得新電視台投資係屬長期兼資金大,所以呢個數字屬暫時性同唔係大數,艾粒透露已傾談新節目合作。