今日係香港時間1月13號星期三，唔係黑色星期五，估唔到今日嘅NBA常規賽都一樣出現傷兵潮，而且傷出嘅仲粒粒皆星。其中，左膝傷嘅公牛球星戴歷路斯（D.Rose），佢喺球隊以101:106輸畀公鹿嘅比賽打咗22分鐘，全場9投3中拎咗9分，第三節已經試過退場接受治理，雖然喺第四節最後5分48秒佢再入場希望繼續比賽，但冇幾耐已經再被換走返入更衣室，由布魯克斯取代。

另外，紐約人前鋒安東尼喺球隊以120:114擊敗塞爾特人嘅比賽，喺第三節初段因為扭傷右足踝而離場，好彩球隊方面話照咗X光之後冇傷到骨骼。31歲嘅安東尼係喺第二節最後1分20秒嘅時候同踩到球證隻腳而扭傷，佢當時出咗場，但下半場又再打過，不過開波冇耐已經因為太痛而退落嚟。打咗18分鐘嘅安東尼，今場收穫有17分、4籃板、3助攻。

至於上一場球隊輸畀爵士因為右跟腱傷而冇出場嘅湖人球星拜恩，今日喺贏塘鵝嘅比賽復出，但因為傷患困擾只係打咗16分鐘，未完半場已經退下火線。早已宣佈咗今季結束後退休嘅拜恩，今場有7分、3籃板、1助攻進賬。

體蘋果facebook專頁↓↓↓
http://fb.com/appledailysports