當年今日
關於我們

馮仁昭四圍超:
戀情告終 女星想公開靚仔拒張揚

蘋果日報 2004/04/13 00:00


靚仔藝人同一線女星一直都冇公開過戀情,但緋聞就傳得好勁,不過佢哋已經散咗幾個月,原來係佢哋對戀情嘅態度出現分歧。靚仔藝人向來花弗,一線女星當然覺得冇安全感啦,所以當佢哋拍咗拖冇幾耐,一線女星就好想公開戀情。

不肯接送女友
雖然一線女星嘅事業如日方中,但佢好愛靚仔藝人,寧願冒住事業下滑嘅危險都要公開戀情,佢諗住外界知道男友名草有主後,起碼會少咗好多女人黐埋去。但係靚仔藝人唔係咁諗,佢覺得自己事業重有得上,加上呢段感情未穩定,公開戀情冇好處。
一線女星同靚仔藝人因為公唔公開拍拖,成日嗌交,加上靚仔藝人驚俾狗仔隊影到相,於是唔肯接送女友,一線女星當然覺得男友對自己唔好,情緒成日失控。久而久之,佢哋嘅感情出現好大裂痕,不過馮仁昭知道一線女星𠵱家對靚仔藝人重未忘情!

雲妮絲惠嘉秘密遊長城
金像女星雲妮絲惠嘉(ReneeZellweger)同金像導演安東尼明格拉(AnthonyMinghella、左)為佢哋合作嘅電影《亂世情天》去內地宣傳。噚日佢哋重喺北京出席記者會,其中安東尼好識做咁大讚中國電影,話佢最欣賞同欽佩就係中國電影人。而雲妮原來就提早兩日訪華,秘密同男友JackWhite遊覽長城等名勝。
empty
張佩金心痛身上疤痕
早前喺上海發生交通意外嘅張佩金𠵱家仍喺當地留醫,噚日接受新城嘅電話訪問時話:「首先多謝大家嘅關心,我一醒番,屋企人就話畀我知意外嘅發生經過。我聽完好驚,原來當時情況咁危險,不過我最接受唔到係身上嘅疤痕,自己都有啲心理唔平衡,因為我好貪靚,所以𠵱家唔想見人住,總之希望快啲好番。」馮仁昭都希望佢早啲返香港同fans見面啦!

周潤發唔得閒做神探
噚日有內地網頁話台灣方面就總統選舉前夕發生嘅槍擊案,搵咗神探李昌鈺調查呢件事,台灣中影公司方面就諗住食住條水,開拍一部名為《神探李昌鈺》嘅電影,搵周潤發做男主角。但馮仁昭好肯定講句,搵發哥做男主角嘅機會真係微乎其微,因為𠵱家發哥傾緊幾部西片,又邊度有時間去台灣開戲呀?

陳彥行食燕窩又愛又恨
陳彥行噚日着住件桃紅色貼身裙喺馬鞍山出席活動,身材玲瓏浮凸,非常誘人。行姐除咗身材好之外,皮膚一樣咁靚,佢話:「我都好鍾意食燕窩,最鍾意就係清燉,不過中醫話燕窩有少少偏寒,好似我呢啲寒底人就唔好食得咁密,可能一個月食一次就得。」唔怪得佢皮膚滑一滑啦,真係恨死唔少女性!
empty
周潤發
資料圖片
empty
陳彥行