其實算唔算摺凳呢？座墊部份的確可以摺埋，而支架部份則可以縮短，之後有個幾靚的凳套，最後可以放在勞斯萊斯（Rolls-Royce）Cullinan車尾，用唔用得着其次，型嘛。6,581歐元買張凳，同揸／坐勞萊一樣，身份象徵。

廠方給予這座椅的正式名字為Pursuit Seat。即是有時候你去到戶外，會見到有人好chill地開張戶外風摺凳坐吓，咁如果你揸勞斯萊斯去到戶外……幻想中的畫面是品牌的SUV Cullinan啦，之後落車想坐吓傾偈又好，坐低釣魚又好，一般摺凳真係未必襯得起你，於是廠方就貼心地推出了這產品。

這張Pursuit Seat的買家，和買車一樣，可以揀選座椅墊皮革的顏色，要襯車廂顏色嘛。當然，收得你6,581歐元，廠方亦保證和旗下車款的內櫳一樣，用料都極講究，支架部份是用上經打磨的鋁金屬，亦有用上碳纖物料，而底部尖端位置則可以在軟腍地面保持穩定，另外更內藏一支電筒，供用家在夜間的戶外地方使用。

如果你正在想，駕駛勞萊的人，何時用得着這張凳？廠方都有提議，就是放航拍機、戶外畫畫，又或者純粹停車想坐低欣賞風景，這張Pursuit Seat都好有用又好有態度。而且可以調校高度，有錢冇高度都冇問題。

撰文：Michael

編輯：鄒仲安

-----------------------------
低頭族上班族必睇 伸展＋穴位按摩自救緩痛
《保健精讀：痛症（頭肩頸）》
-----------------------------
8大一日遊行程懶人包 食盡本地海鮮農家菜
即睇《遊嚐假期2020》電子書

-----------------------------

支持蘋果深度報道，深入社區，踢爆權貴，即Like蘋果專題及調查組FB專頁！