煲呔連任在即,各政黨齊齊迫上床,鬥掀被冚,保皇造勢,錦上添花,不過煲呔就向泛民,單眼俾訊號,話歡迎加入痕政會議,企圖雪中送炭!
郎情妾意,泛民陣營,亦開始氣現嬌喘,面泛紅暈,話考慮會加入,同其他政黨一齊,加入「官人我要」嘅金瓶梅式小合唱!
不過,親中政黨就擔定櫈仔,指定要幾個局長、副局長等,而泛民最多,就喺痕政會議擺多張櫈、多雙筷,雖然,逢星期二,可以近距離親褻曾爵士,齊開會,共呼吸,對於好多人,係三生修來嘅福份,不過痕政會議,有名無實,有名你叫,至多係掃吓背,𢱑吓痕,並非好似局長同副局長咁,係埋牙打正真軍!
自由黨田少夠做過痕政會議,不過田少就好有大志嘞,呢啲咁嘅虛位,好似齊天大聖招攬咗上去做避馬瘟咁,核心未必入到,黑鑊就勁有得孭,痕政會議呢個竇,經前朝董伯狎玩多年,冇晒公信力,權威麻麻,凡有性格嘅人士,都唔會恨到流口水!
不過泛民新來新豬肉,繡花枕溫,芙蓉帳暖,大家先相睇,後親暱,入門飲杯茶,互相摸吓底咁,都冇壞,至於邊個蝕底?仲使問,古往今來,梗係做女嘅嗰方,俾人呃咗隻金豬咧!