離開是為了回來？特區政府史上最年輕嘅副局長陳岳鵬（Ronald），早前向政府交信辭職say goodbye，重返校園到美國哈佛大學甘迺迪學院修讀公共行政碩士課程。其實本月16日休假後無耐，佢已經飛咗去美國開學，今日、即係28日正式離任之日，相信喺校園內上緊堂。佢都有喺Facebook貼校園照，孭住背囊嘅佢似足學生哥（雖然，好少學生哥似佢咁多鬚......），笑意盈盈好happy！

睇真啲，佢嘅同學當中，有位仁兄好面善，原來係財政司司長政務助理胡偉文（Raymond）嚟㗎喎！乜呢位財爺前AA又離開咗熱廚房去讀書咩，點解會做咗Ronald嘅同學？查實特區政府每年都有一個名額畀政務官到海外進修，今年嘅名額就落喺Raymond身上嘞！

其實獲政府支持去海外進修嘅，通常都係明日之星，而Raymond近年最為人熟悉，可能係佢喺商務及經濟發展局擔任首席助理秘書長（工商）時，四出為當時審議中嘅《競爭條例草案》解畫，估計學成歸來，仕途無限。