當年今日

【TVB配音組又作反】 《海賊戰隊》狂寸雞汁May薯片盈

蘋果日報 2013/11/19 06:00


TVB做嘢是是旦旦,啲劇又不合邏輯,穿崩位多,網民經常負評,可能內部員工都頂唔順咁「膠」,近日有就發現無綫高清台J2,播緊勁hit嘅動畫《進擊的巨人》嘅宣傳片,但當中嘅對白同套動畫根本冇咩關係:「我哋渴望自由,但係唔敢抗爭;追求平等,但又戀慕權力;以前我哋畏縮,今天更加妥協;口口聲聲探尋公義,但又自甘墮落,將來,注定失去更多!」網民睇完都激讚配音組勇敢,仲話佢哋今次作反呀!

今日網絡上又流出咗另一條TVB配音組配音嘅片,係特攝片《海賊戰隊》嘅片段,片段分別有幾個情節,都無端端出現「雞汁」同「薯片」呢兩樣九唔搭八嘅嘢,擺到明寸爆May姐同「薯片盈」沈卓盈啦!其中一隻怪獸食晒枱面嘅嘢示範實力,點知隻怪獸食完啲嘢後,個壞人就講咗句:「起碼畀返啲雞汁我點薯片吖!」之後隻怪獸走咗去食嘢,食完之後就講咗句:「如果可以點埋雞汁就更加正。」

之後劇情跳到去有班人坐喺到食餃子,佢哋就大讚啲餃子好食,但當中嘅對白就係「嘩,煎得好有雞味。」「好似薯片啊!」同埋「啲餃子我落咗好多雞汁。」0依條片當然引嚟唔少網民激讚,仲話:「因為佢地都頂唔住雞汁太多,都不禁要抽下自己台水,呢個係配音組又一力作,抵讚!」