38歲日本男星藤岡靛（Dean Fujioka），早年曾喺香港及台灣發展，拍過何韻詩嘅《勞斯‧萊斯》及《睡王子》MV，前者與陳冠希分別扮演「勞斯和萊斯」，兩人當年「都是花樣男子」。

Dean原名藤岡龍雄，1980年出生於日本福島縣，2004年在香港出道，從事模特兒工作，留港期間拍攝過唔少廣告，亦拍過兩部香港電影《八月的故事》及《七月好風》，不過最為人熟悉應該就係《勞斯‧萊斯》嘅MV。Dean父親生於中國山西省，曾從事IT相關工作，母親就係個鋼琴教師，家中共有四兄弟姊妹，胞妹藤岡麻美都係藝人，曾加入日本女團及在台灣發展。

06年開始，Dean轉戰寶島，當時獲台灣偶像劇之母柴智屏羅致旗下，首部台劇係《極道學園》，之後就同「大S」徐熙媛、「小豬」羅志祥合演《轉角‧遇到愛》，仲有《不良笑花》、《就是要你愛上我》，操得一口流利華語。四年前，Dean終有機會回流日本發展，憑住NHK電視台晨早劇《阿淺來了》成功走紅，如今已係個演而優則唱人氣男星。Dean當年在香港發展時生活艱難，佢亦曾因面癱休養半年，慶幸佢如今已出人頭地，更在台灣發展時認識現時嘅太太，兩人先誕下一對龍鳳胎，17年3月再度添丁，加上仲有一名20歲繼子，即使冇血緣關係，但Dean都視對方為自己骨肉一樣。

精選娛聞，喺晒《娛果》
http://fb.com/appledailyent