美國5月增加28萬個職位，是今年之冠，遠超市場預期，加上打工仔收入增幅三年最勁，推動加息預期，美債孳息上周五彈抽八個月高位，帶挈美元應聲向上，令全周跌幅收窄。美滙指數上周收報96.3，下跌0.6%。主流非美貨幣表現參差，日圓和紐元繼續被質，美元曾升至125.87日圓，再創十二年新高；紐元跌至70美仙邊，是四年半最弱。受惠通脹重現，歐元反彈1.2%，加元就得益於就業數據理想，上周力保不失。
就業數據出爐後，市場對聯儲局12月先加息的預期下降，家陣估計9月或10月出手機會較高，但10月會後冇記招，9月出手較啱key。當然，家陣距離9月議息仲有三個月，美國以至外圍經濟都仲有好多變數，尤其是國基會（IMF）上周亦罕有地開腔，奉勸聯儲局今年唔好加息住。聯儲局下周二議息，唔加息就預咗，所以焦點落在主席耶倫會後記招內容，估計佢繼續重申狼來了，等大家有心理準備迎接最快9月加息。