日本組合AKB48今晚假新潟舉行「第8屆AKB人氣總選」，富士電視台於當地時間黃昏6時半開始直播，現年28歲嘅小嶋陽菜喺螢光幕上正式宣佈「畢業」，據知佢未定邊日正式退團，之後將專注做model同埋單飛喺圈中發展。

陽菜今年玩嘢以「喵喵假面」姿態再戰「AKB人氣總選」，可惜最後一次參賽都係十甲不入，本年度僅得16位，連前隊友大島優子都扮狗驚喜現身，化身「汪汪假面」搞氣氛。

觀乎今屆成績，21歲嘅AKB上位成員武藤十夢，成功以58,624票躍升到第10位。HKT48嘅19歲主將兒玉遙，今年佢以60,591票升到第9位。第8位嘅島崎遙香今年都係最後一次參選，共得68,126票，出名鹽對應嘅佢難得開金口，島崎遙香事前諗定感言，佢就話雖然有想過離隊，但仍會繼續努力。至於SKE48成員須田亞美里，今次就爆冷打入「神7」。上年第7位嘅HKT猛將宮脇咲良，就升多一級以78,279票排第6位。