股海實戰錄:氣氛偏淡先離場

蘋果日報 2002/05/29 08:00


趙飛雲同大部份散戶一樣,等緊好淡決戰搵出後市方向,點知噚日期交所下午電力故障,3點多少少就要停市,現時期指即月未平倉合約重有39103張,今日可能幾波動。
現貨冇受期指停市影響,午市恒指重升番些少,最後收11581,升16點,但趙飛雲見恒指無力重返11600之上,按原定計劃沽出恒指Call輪9045。
其實噚日都有些少好消息浮現,滙豐(005)高層睇好香港經濟跟隨美國復甦,趙飛雲想過唔沽9045,但部份近期當炒嘅二三線股如光通信(603)等先升後跌,加上華晨(1114)有不利報道,而且恒指已跌穿20日線4日,短期技術轉壞機會多過向好,因此趙飛雲決定清貨離場,等好淡分勝負後再出擊。

港股中長線向好
恒指短期支持位11400相當關鍵,如果失守,250日線11348至50日線11290亦未必守得穩,形勢上轉軚造淡勝算較高,但經過98年官鱷大戰後,趙飛雲感情上唔鍾意造淡,加上港股長期升勢未破壞,中長線造好嘅勝算始終高啲。當然,如果恒指今日以強勢重上20日線11705之上,亦會買番1注恒指Call輪9045。
趙飛雲