硬淨堅毅唔再係男士嘅專有名詞，早排嘅「搬運羅拉」運輸女神朱芊佩就試過畀網民洗版式追捧（新聞連結： https://bit.ly/2wE7ujh ）。

兩位文青女神談善言（Hedwig）、李靖筠（Gladys）都話想試下轉型，早前嚟咗《蘋果日報》客串做苦力，學人搬報紙。估唔到主打文青形象嘅兩人，抬起一堆堆厚重嘅報紙，依然應付自如。

一身工人服打扮嘅Hedwig，佢話o依家啲男仔未必鍾意小鳥依人女仔：「多咗男仔鍾意獨立女仔，o依家大家壓力好大，太過依附嘅女仔會有壓力。」不過Gladys認為柔弱嘅女仔仲有市場，覺得佢好型，佢話：「呢排可能social media唔鍾意港女，有個搬運羅拉咁爽朗，所以跑出嚟。」至於自己性格，佢形容自己都幾心急有少少強迫症，但就好在冇公主病。

Hedwig同Gladys合作嘅電影《告別之前》聽日上映，片中有3段面對死亡嘅故仔。對兩位90後嘅女仔，死亡有點遠，Hedwig話以前好白痴，以為呢樣嘢唔會係身邊發生：「到有親人過身，意識到死亡唔係咁遠，由出生就開始走緊去嘅終點。」假如生命只剩半年，佢話一定唔會畀阿媽知，因為媽媽唔係好受得刺激，佢話：「屋企係好傳統中國家庭，都幾內歛。會同家姐講，之後細佬，老竇比較豁達。最尾至同媽咪講，會寫封信畀佢。」臨終前佢話想去多次冰島，因為上次睇唔到極光。仲想臨走拍一套有關生死嘅戲，佢話：「因為今次係切身感受到死亡，對生死應該有唔同睇法。」

Gladys話兩年前同位好朋友爬山，係最接近死亡一次，佢話：「突然佢失去知覺，跌落地穿頭流血，嗰一刻完全handle唔到，自己都black out咗睇唔到嘢。原來死亡係咁近。」假如生命在半年倒數，Gladys話會繼續開工，佢話：「咁難得做到自己想做嘅嘢，更加博命瘋狂開工。細個有一個想法，張國榮非常幸福，佢當時唔開心，經歷緊好多痛苦嘅嘢，但佢可以係人生高峰離開，未嘗唔係一件『爽快』嘅事。爬上入生高峰離開，大家都會記得你，幾美好。其實我係個啲忍唔住同人講，但我會選擇收埋死，唔想俾人見到我好痛苦，記住我美好最靚一面。」

化妝：German Cheung（談善言）
髮型：Larry Ho of IL COLPO GROUP（談善言）
服裝：Monki（談善言）、i.t. Beams（李靖筠）

精選娛聞，喺晒《娛果》
http://fb.com/appledailyent