電視台生存空間，受到數碼化影響，觀眾要娛樂，唔一定要限時限刻坐定定喺公仔箱前面，只要手機或電腦喺手，想幾時睇都冇問題。杜汶澤就看準呢個大趨勢，佢呢幾個月就籌備搞網台，阿澤終於宣佈本月23日開台，嗰晚10點會喺facebook開live，佢溫馨提示大家要睇佢個《杜汶澤late show》。

阿澤今日接受《蘋果》電話訪問時話：「我同朋友夾份開嘅，想拍啲網上節目，我都幫ViuTV同奇妙電視拍好多節目，但我發覺有啲idea好想自己搞，電視台尺度、級別唔可以太大膽，我自己畀錢拍。」阿澤話佢同盧覓雪，又有性治療師何慕詩一齊大膽講性，另外佢早前又同盤菜瑩子去咗日本拍《日本風涼話》，阿澤繼續話：「仲構思緊好多真人騷，有啲係教育節目，我搵咗江若琳，教識佢點樣做個好老婆，教佢點服待好老公，咁就永遠唔出去滾，永遠唔變心。」阿澤話佢嘅節目好多元化：「又啱家庭觀眾，又啱主婦睇，又啱毒L，你唔睇就笨啦。」

大家不如搶先睇吓《杜汶澤late show》嘅trailer，睇下係咪咁好笑。預告片中講到佢哋嘅late show係會迎合唔同智商同道德層嘅觀眾，仲話好有教育意義，阿澤就同新女貝依霖去咗學做腳底按摩，佢同師父交流期間，阿澤話題竟扯到要教番師父空手道打男人下體，佢再一邊示範，一邊好搞笑咁話：「等手掌放鬆就啪落去，啪完佢直接去歌連臣角。」

阿澤又去同性治療師何慕詩面談，阿澤鏡前大爆自慰次數，同坦誠向性治療師形容勃起狀態，認真娛樂「性」豐富。阿澤早前孖住盤菜瑩子去咗日本拍《日本風涼話》，阿澤去咗鴨店向鴨王指教，佢又學整壽司，不過去得日本唔少得去濕平，阿澤同盤菜瑩子唔係去買潮裝，佢哋竟去咗性商店，見到貨架放滿潤滑劑，阿澤目不轉睛，盤菜瑩子笑言嗰啲係WD-40，阿澤聽後笑爆嘴，忍唔住寸盤菜瑩子：「度門生銹呀，老公，買支WD-40返嚟。」當中仲有剪咗佢面試時花絮，有一個女生竟示範鋼管舞，為份工不惜出「股惑」，令阿澤看到眼定定。

精選娛聞，喺晒《娛果》
http://fb.com/appledailyent