自從薯片叔叔曾俊華過完冷河，做乜嘢都唔使怕要畀政府批准，佢就越嚟越多搞作。繼投身商界搞創科之後，最新搞作係孖住自由黨榮譽主席田少田北俊一齊踩上舞台，做「志雲大師」陳志雲嘅表演嘉賓，兩個JT仲要一玩就玩4晚。志雲大師同八方預告，薯片叔叔同田少有五不做，但一樣可以令觀眾捧腹大笑，真係巴閉！
志雲大師今個星期五（20日）到下個星期一（23日）會喺理工大學賽馬會綜藝館舉辦《志雲尋志雲 登陸舞台演嘢會》，呢幾日就忙緊為演嘢會綵排，佢噚日喺facebook貼咗幾張綵排相，入面竟然有薯片叔叔同田少出現，大師仲留言話：「Count down to Show time. Fun rehearsing with John and James」

做足4晚嘉賓

八方問大師，點解有薯片叔叔同田少出現？大師話佢兩個會做《尋志雲》嘅表演嘉賓，佢又話好開心薯片叔叔同田少肯做足4晚，但究竟表演乜嘢？志雲大師就話要賣個關子，唔可以講畀大家聽佢哋做乜，但就可以講佢兩個一定唔會做乜，包括唔會唱歌、唔會跳舞、唔會變魔術、唔會講人閒話、唔會講人是非，若果佢兩個咁多嘢唔做唔講，咁可以搞乜呢？大師話呢個等到時就知，又話佢兩個可能每一晚嘅表演內容都唔同，但大師好肯定咁話，一定會做到令大家捧腹大笑之餘，都有深度嘅思考。八方諗佢兩個最熟嘅一定係政治，唔知又會唔會好似子華神咁，講政治甚至講特首林鄭月娥呢？呢啲唔算講人閒話嘛！

李八方