今朝早（29日）嘅沙田晨課一早就見有大太陽出現，天氣較前幾日溫暖，而且喺烽火台仲見到練馬師呂健威帶埋自己寶貝囡嚟觀操。

佢哋更成朝都影形不離，睇嚟兩父女感情都幾好，起碼囡囡都肯一早起身陪daddy，一表孝心；又或者威哥想栽培自己囡囡成為接班人呢！

周三（31日）晚沙田泥地夜馬，威哥就採用精兵制，全晚只出三駒分別為頭場「有智者」、第四場「威勢之寶」及第八場「喜盈運」，其中「威勢之寶」曾經喺今仗同班同程嘅田泥1650米贏得今季唯一勝仗。

雖然上仗賽後「威勢之寶」流鼻血，但經過近三個月嘅照料，相信健康已經全面回復，且近一個月見習生蔣嘉琦一直摸到實，但因為嘉琦BB今期停賽，先換咗另一華將蘇狄雄。而今朝呢匹馬出試嘅時候，威哥仲望到實，值得留意。