香港蘇富比今年嘅秋拍會喺9月29日至10月3日舉行，有關中國書畫嘅拍賣會則喺10月2日進行。

今次嘅中國書畫秋拍會有近300件近現代書畫作品，總估值達2.6億港元。蘇富比今日舉行傳媒預覽，其中最受關注嘅係李可染嘅山水畫代表作《千巖競秀萬壑爭流》，呢幅長逾1.7米、寬約1米嘅山水畫創作於1978年，尺幅之巨市場罕見。畫名嚟自魏晉南北朝嘅《世說新語》，形容浙江會稽山嘅秀美，據知李可染曾經喺50年代到訪會稽山，之後不時將之融入畫作。

呢幅山水畫估價係蘇富比中國書畫部歷來最高，估價約值7800萬港元，超越2016年喺香港蘇富比春拍登場、估價為5000萬至6500萬港元嘅張大千潑彩畫《桃源圖》，《桃源圖》最後以2.4億港元成交。

其他焦點拍品仲有傅抱石嘅《西山夜渡圖》、張大千嘅《秋山嵐翠》，同徐悲鴻嘅《飛揚跋扈為誰雄》等。