有幫襯中資銀行或者買內銀股嘅街坊要留意番嘞，噚日有個「香港中資銀行業協會」成立，仲請齊財爺曾俊華、財經事務及庫務局局長陳家強，仲有金管局總裁陳德霖到賀，幾有飛士呀。
呢個協會有乜咁巴閉呢？香港銀行業一直只得一個具代表性嘅「銀行公會」，並由本港3間發鈔銀行匯豐、渣打同埋中銀香港嘅代表輪流做主席，𠵱家似乎係成班「國家隊」想另起爐灶喎。

會章只得中文版

呢班國家隊有六大中資機構，包括中銀香港、工銀亞洲、農行香港、建行亞洲、交銀香港，仲有國開行香港，而所有香港嘅中資銀行都係會員，暫時總共有32個會員，以後會坐埋一齊研究「一帶一路」、「十三．五」規劃，睇吓銀行可以點樣從中搵到發展機遇，簡言之即係搵銀。
副會長陳振英強調，新成立呢個協會並非要取代邊個，銀行公會一直比較注重規管、政策，而中資銀行業協會就係主要講發展機會。
佢哋已經籌備咗成年，所有會員都係中資金融機構，如果有外資機構想參加，佢哋無任歡迎，不過就要由佢哋發出邀請先得。
暫時香港中資銀行業協會嘅會章都只係得中文版，將來會譯番個英文版本，畀有需要嘅銀行使用。咁唔知佢哋開會，係咪只講煲冬瓜呢？

李華華
mailto:[email protected]