2018亞洲小姐競選香港區候選佳麗，繼噚日首度會見傳媒後，今日隨即到會展出席鐘錶展，不過6號張靜婷因眼部不適缺席，只得九位佳麗出席。

佳麗喺活動上獲大會送贈手錶做紀念，九人都着住唔同打扮現身，其中9號李芷菱嘅大V領同3號張靜茵一字膊裝比較搶眼。

李芷菱喺接受訪問時，講到今日打扮好搶眼，佢話：「因為膚色比較白，所以特登揀比較鮮色嘅衫。」問到係咪特登揀V領搶鏡？佢話：「唔關事，衫係經過大會服裝指導睇過，佢哋覺得OK。」又透露最近已經開始密密操練：「有陳嘉容教我哋儀態，仲有跟Sunny Wong學跳舞，自己都係第一次跳舞，對我係一個好新穎嘅嘗試，因為我向來鍾意畫畫。」經過一個星期跳舞訓練，佢話自己嘅表現已經有啲脫胎換骨。咁對今次選比賽有冇信心？佢就話：「信心一定有，最緊要係希望大家見到我努力訓練嘅成績。」

同樣以服裝搶鏡嘅3號張靜茵就表示：「自己最滿意鎖骨部分，所以今日特登揀咗件露膊裝，希望帶出一啲骨感美。」身型偏瘦嘅佢話自己體重42KG，而近來操練好頻繁，需要好多體力，自己亦都食多咗好多嘢。

而年紀最細嘅8號傅美霖今日就着得比較密實：「密實啲好，呢度冷氣凍。」咁怕唔怕俾其他佳麗搶鏡？佢就表示：「我有自信，有自信就靚㗎啦。」咁對身體邊個部位最滿意？佢話：「膊頭啦，我個膊頭有角度睇落好舒服。」

精選娛聞，喺晒《娛果》
http://fb.com/appledailyent