今年立法會3.11補選都完咗快兩個月，各位參選人交補選開支嘅死線都越嚟越近。參選港島嘅維園阿哥任亮憲就交咗數啦。睇番佢都花咗唔少錢，合共85.5萬幾蚊，當中使得最多當然係賣廣告啦，有成66.6萬咁多。可惜都係以3,580票輸咗，計落每票接近240蚊都幾貴。

任亮憲確實花咗唔少錢賣廣告，喺小巴、海報、短片、報紙，甚至facebook都有，可惜效用似乎唔大。
就以facebook為例，維園阿哥最多人睇嘅post叫做「任亮憲x沈大師（訊匯證券行政總裁沈振盈）」，有超過3.5萬點擊率，但八方好懷疑咁嘅成績係咪應該歸功沈大師呢？因為任亮憲另一個post講預算案派錢，都係得1.4萬多hit rate，維園阿哥而另一個「大話連篇區諾軒，政治誠信去咗邊」嘅post都只係得2,562人次睇，真係相形見絀。
講完選舉開支講番收入，任亮憲收到嘅捐贈只得6.1萬，而且唔係現金，而係由一間公司捐出嘅服務。睇嚟呢次任亮憲都蝕唔少喎。