內地央企保利集團旗下的物管公司保利物業(6049)，近日招股孖展反應hot到爆，但有精明散戶發現，公司個標誌(logo)居然同本港政黨民建聯嘅logo有99.99999%相似。兩者logo簡單講，都係由外面一個英文字母「D」/「P」，包住另一個「D」/「P」，但連圖案嘅角度、闊度都近乎一樣。

睇返保利集團同系內公司嘅logo，由於保利英文名係「POLY」，公司logo一向都統一用公司縮寫、一個類似英文字母「P」嘅物體，唔知點解今次保利物業就轉登改少少，結果卻同民建聯嘅logo撞到應一應。話說多年前社民連年宵賣過件「民建聯禮義廉」T恤，由於T恤上嘅logo民建聯幾乎一樣，結果俾民建聯指有關T恤涉嫌觸犯《版權條例》及《商品說明條例》，兼被海關沒收扣查。唔知今次民建聯敢唔敢投訴「阿爺」旗下公司涉嫌「抄考」呢？

保利後台有幾猛，民建聯應該好清楚嘅......市場盛傳，保利集團係中國擁有軍方背景最大嘅軍火進出口商，前身係中共軍方總參謀部裝備部（歸口管理對外軍貿）同中國國際信託投資公司，於1983年中聯合組建的保利科技有限公司。1993年組建成保利集團，係中共軍方對外軍火貿易嘅主要單位。目前集團主要業務為軍品、民品國際貿易、房地產開發、文化藝術經營、礦產資源領域投資開發同民爆科技。

話時話，民建聯啱啱喺區選大敗，議員數目大跌，希望保利物業下星期上市，股價唔好咁唔吉利大跌啦！

李華華