山頂杜莎夫人蠟像館噚日公布咗一個幾嚇人嘅調查，本港藝人黃夏蕙幾乎同拉登齊名！蠟像館訪問咗五百個參觀者，叫佢哋選應放喺館內「恐怖魔屋」嘅名人蠟像，結果最多人揀拉登，第二位係夏蕙姨（見圖），第三位係國際巨星米高積遜。啲參觀者真係幽默！八方就覺得夏蕙姨冇咁恐怖啩？
被問到「你最希望與哪位名人共處荒島上？」最多人想同歌手劉德華一齊，其次係成龍，第三係已故嘅英國儲妃戴安娜，靚仔足球明星碧咸同歌手王菲就分別排第四同第五。
至於「誰是世上最性感的人？」估唔到重係逝世多年嘅影星瑪麗蓮夢露，睇嚟佢嘅性感形象真係冇人能夠取代。最多人希望蠟像館下一個為佢做蠟像嘅男名人係影星周潤發，女名人係已故歌手鄧麗君。蠟像館話𠵱家已經整緊鄧麗君嘅蠟像，今年五月就有得睇。


E-mail：[email protected]