傑志同東方兩大老牌球會，聽日就喺旺角場爭今季最後一項淘汰盃賽足總盃冠軍。雖然已到季尾，但兩隊都話會盡砌，希望標到尾會；其中東方再次懸賞180萬元巨額獎金爭標，希望可以同傑志平分首屆港超四項錦標，齊齊做「雙料冠軍」。
東方噚朝繼續喺青衣東北球場練兵，而一眾今季外借嘅球員已全部歸隊，副總監歐偉倫仲一早到場督操，開操前同教練高尼路同助教黃鎮宇烈日下密斟十幾分鐘，幾個表情多多。
教練高尼路就話，基奧雲尼同美路史拿域等傷兵都可以候命，至於周日出咩人，就仲諗緊，但肯定搏盡求衞冕足總盃；而總監梁守志就透露，高層季前定咗盃賽冠軍獎金為180萬港元，足總盃亦唔會例外，希望好頭好尾，繼銀牌後捧埋足總盃，之後再爭亞協附剩番一個出線席位。

至於傑志做咗首屆港超盟主後，竟然三場不勝，仲要場場失兩球以上，而高層唔知係咪見球隊有啲沉，連續兩日公佈好消息；繼公佈同巴倫古素續約後，總領隊伍健透露佐迪亦續約兩年。呢位已屆34歲老將噚日收操笑住話，呢五季踢傑志踢得好開心，就算有其他隊斟都決定留底。佐迪完成呢兩年合約就夠居港滿七年，佢唔排除轉埋籍做港人，代表港隊踢國際賽咁話。